
வீட்டருகில் தட்டுவதும் யாரோ வென்றே
விழைந்தங்கே நான்வந்தேன் உயரே சென்றாய்
ஏட்டிலுனை நான்கண்டேன் ஏக்கங் கொண்டேன்
எனைக்கண்டே அஞ்சியென்றும் எழுவ தேனோ
விரிந்தபனை மீதிருந்தே விளித்து நிற்பாய்
விரைந்தங்கே நான்வந்தால் விலகிச் செல்வாய்
அறிவாளைப் போலுன்றன் மூக்கி னாலே
ஆனதுபார் துளையொன்று மட்டை மேலே
மீண்டுமுனைத் தேடியெங்கும் ஓடி வந்தேன்
மின்னலாக நீபறந்தால் என்ன செய்வேன்
வேண்டுமென்றே எனையென்றும் ஏய்க்கின் றாயோ
விளையாடும் எண்ணத்தில் வந்துள் ளாயோ
நிழற்படம்நான் எடுக்கவேண்டும் நின்று செல்லேன்
நீயதற்கே உதவவேண்டும் என்று பாரேன்
அழகான உனையென்றும் அருகில் காண
அதுவொன்றே வழியென்று புரிந்து கொள்ளேன்!