உழவர்களின் நலனைச் சற்றும் கருத்தில் கொள்ளாது பன்னாட்டுப் பெரும்நிறுவனங்களுக்குச் சாதகமாய் மத்திய அரசு செயல்பட்டு வருவதை எதிர்த்தும், உழவர்களுக்கு ஒரு அடிப்படை வருமானத்திற்கு உத்திரவாதம் கோரியும், வரலாற்று சிறப்பு மிக்க ஒரு மாபெரும் விவசாயிகள் கூட்டம் மற்றும் போராட்டம் ஒன்று கடந்த மாதம் (மார்ச் 18 முதல்) டெல்லியில் கூடியது. இதில் இந்தியா முழுவதிலிருந்தும் விவசாயிகள் வந்திருந்தனர். நம் தமிழகத்திலிருந்தும் நூற்றுக்கணக்கான விவசாயிகள் வந்திருந்தனர். உழவர் உழைப்பாளர் கட்சி தலைவர் செல்லமுத்து, இயற்கை விவசாயி ராஜரீகா, விவசாயிகள் தலைவர் நல்ல கவுண்டர், கன்னையன் போன்றவர்களை அங்கு காண முடிந்தது. உத்தர பிரதேசம், ஹரியான, பஞ்சாப், முதலிய மாநிலங்களிலிருந்து பெரும் திரளாக விவசாயிகள் வந்திருந்தனர்.